Jardunaldiak 2021

DBHko 4. eta Batxilergoko 1. ikasmailetako ikasleei zuzendutako jardunaldiak 5. edizio honetan bi formatu ezberdin uztartuko ditu.

Iruñerriko ikastetxeetarako berreskuratuko du lehen hiru edizioetan erabilitako aurrez aurreko formatua eta Baluarte Jauregian antolatuko da irailaren 23an.

Gazteak eduki ezberdinak eskainiko dituzten hiru aretotan barrena mugituko dira:

Info Aretoa

Ezagutzara bideratutako gune honetan, euskarazko kultura digitalaren esparruan aitzindari izan diren eta egun lanean diharduten 6 proiekturen inguruko aurkezpen labur (15’) bana entzunen dute ikasleek. Hala, Puntu Eus Fundazioak, Egunean Behin jokoak, Ahotsak egitasmoak, Gatazkarik Gabeko Teknologiak eta Euskal Wikilareien Elkarteak une honetan esku artean dituzten hainbat proiekturen berri emanen dute.

Ikas Aretoa

Gune praktiko honek 8 lantegi ezberdin hartuko ditu eta, 20 laguneko taldetan banatuta, ikasle bakoitzak horietako batean trebatzeko aukera izanen du. Tailerrak dagokion sektorean eskarmentua duten profesionalek eta elkarteetako ordezkariek gidatuko dituzte. Honakoa da eskaintza:

  • Musika sortu, nahastu eta zabaltzeko aplikazioak (Dj Makala)
  • Bideomappinga: errealitatea areagotu proiekzioak objektuen geometriara doituz (Elurmaluta)
  • App Inventor: Android mugikorretarako aplikazioak sortzeko zerbitzua (Talaios)
  • Errealitate birtualera hurbilpena (Protomakers)
  • Memeak: umorezko mezu sinpleak dira, kultura digitalaren ezinbesteko edukia, are gehiago nerabe eta gazteen artean. (Ion Celestino)
  • Arduino: elektronika interaktiboaren munduan hasteko (Protomakers)

3D inprimagailuak: objektuak diseinatu eta modelatu (Protomakers)

Era Aretoa

Erabileran sakontzeko pentsatutako areto hau da aurtengo Sarean Euskaraz Jardunaldiak dakarren berrikuntza nabarmenena, eta bi hitzaldi programatuko dituzte bertan, bakoitza 35 minutukoa. Biek ala biek IKTen erabilera egokia egitearen garrantziaz ohartarazi eta horretarako jarraibideak azalduko dituzte. Izan ere, IKTek gero eta presentzia handiagoa dute herritarren egunerokoan, baita esparru pribatu eta intimoenetan ere.

  • Pribatutasuna Sarean (Maider Likona, Gipuzkoako Software Askea)
  • Harremanak 3.0: like bat eman (Ane Ortiz, Emaize Sexologia Zentroa)

Iruñerritik kanpoko ikastetxeen kasuan, ordea, iazko formatu erdi-presentziala errepikatuko da eduki zuen arrakasta dela eta. Kasu horretan jardunaldia deszentralizatuko da eta ikastetxeetan antolatuko da. Bertan lantegi praktiko bana eta Moodle plataformaren bidez ikastaro birtualak antolatuko dira.

8 lantegi praktiko ezberdin eskaini dira eta ikastetxeek, ikasle kopuruaren arabera, bana edo bina aukeratu dituzte. Ikasle bakoitzak horietako batean trebatzeko aukera izanen du. Sektorean eskarmentua duten profesionalek eta elkarteetako ordezkariek gidatuko dituzte lantegiak. Honakoa da eskaintza:

  • Musika sortu, nahastu eta zabaltzeko aplikazioak (Dj Makala)
  • Podcast (Dj Makala)
  • App Inventor: Android mugikorretarako aplikazioak sortzeko zerbitzua (Talaios)
  • Errealitate birtualera hurbilpena (Protomakers)
  • Memeak: umorezko mezu sinpleak dira, kultura digitalaren ezinbesteko edukia, are gehiago nerabe eta gazteen artean. (Ion Celestino)
  • Arduino: elektronika interaktiboaren munduan hasteko (Protomakers)
  • 3D inprimagailuak: objektuak diseinatu eta modelatu (Protomakers)
  • Raspberry Pi: plaka-ordenagailu txiki eta merkeak (Protomakers)

Lantegien iraupenari ahalik eta probetxu handien ateratzearren bideo-tutorial bat aurreratuko da azalpenekin.

Bi ikastaro, Pribatutasuna Sarean (Maider Likona, Gipuzkoako Software Askea) eta Harremanak 3.0: like bat eman (Ane Ortiz, Emaize Sexologia Zentroa) online eskainiko dira Moodle ikaskuntza plataforma librearen bidez. Saio biek IKTen erabilera egokia egitearen garrantziaz ohartarazi eta horretarako, jarraibideak azalduko dituzte. Izan ere, IKTek gero eta presentzia handiagoa dute herritarren egunerokoan, baita esparru pribatu eta intimoenetan ere. Saioak 4-5 minutuko hainbat bideo-pilulek eta haiekin lotutako ariketek osatuko dituzte.

Bi saioekin batera, euskarazko kultura digitalaren esparruan aitzindari izan diren eta egun lanean diharduten honako proiektuen aurkezpen bideo laburrak izango dira: Lehen Hitza Euskaraz, Wikipedia euskaraz, Gazte Gara Gazte, Egunean Behin eta Gatazkarik Gabeko Teknologia.